i-s-a's VirtualTourist Home Page

ROSARYO
ika-17 ng Enero 2007
tula ni Nicodemus P. Corpus

Rosaryong sa ami’y naiwang pamana,
sa bawat tahana’y dulot ay pagsinta.
Yao’y nagbibigkis ng buong pamilya,
na ang tinutungo’y langit ng ligaya.

O mahal na Ina, ang aming dalangin,
kaming mga anak ay iyong kupkopin.
Ilayo sa tukso at kami’y akayin,
sa landas ng buhay, na dulot ay aliw.

Sa Iyong paglibot sa bawat tahanan,
yao’y nagbabadya Niyong pagmamahal.
Binibigyang lakas, kaming nalulumbay,
na aming makamit, ligaya sa buhay.

Ang bawat misteryo, yao’y nagbabadya,
ng landas ng buhay, ng Anak mong sinta.
Mulang ipaglihi, hanggang ihandog na,
sa sangkatauhan, ang tanging hininga.

Rosas na bulaklak ang kahalintulad,
butil ng rosariong, anong gandang hiyas.
Yaong mga dasal na inilalahad,
papuri sa Iyo at Anak mong liyag.

Yaong pananalig laging palakasin,
maging kaluluwa at katawan namin.
Pag-ibig na wagas, sana’y paghariin,
sa aming isipan, puso at damdamin.

O mahal na Ina salamat sa Iyo,
sa mga pagkupkop, sa aming anak Mo.
Yaong mga dasal, taglay ng rosaryo,
magsilbing kalasag, sa tawag ng mundo.

Rosaryo is the poem he offered to Mama Mary before he passed away